OZALI KONYOKOLA MOBIKISI NA YO?

“Saulo, Saulo, mpo na nini ozali konyokola ngai?”
— Misala 9:4 (Mokanda na Bomɔ́i)

Ezali na makambo mosusu oyo moto akoki kosala mpe komona ete ezali malamu na miso na ye, kasi na bosolo, makambo wana ezali kolembisa mpe kosala mawa monene na motema ya Kristo.

Ntoma Paulo, oyo liboso bazalaki kobenga Saulo, akanisaki ete azalaki kosala mosala ya Nzambe tango azalaki kotelemela bato oyo balandaki Yesu. Azalaki na posa makasi (zèle), amonaki ete azalaki kobatela kondima. Kasi ayebaki te ete azalaki mpenza kobundisa Kristo Ye moko.

Ezalaki kaka nsima ya bokutani na ye ya kokamwa na nzela ya Damas nde bosolo efungwamaki:

“Lokola akweyaki na mabele, ayokaki mongongo koloba na ye: ‘Saulo, Saulo, mpo na nini ozali konyokola ngai?’ Bongo alobaki: ‘Nkolo, ozali nani?’ Mpe Ye alobaki: ‘Ngai nazali Yesu, oyo ozali konyokola.’”
— Misala 9:4–5 (Mokanda na Bomɔ́i)

Na monoko ya Greki ya ebandeli, liloba oyo ebongolami lokola “konyokola” elakisi mpe kosala moto pasi, konyokonyoko, to kotungisa ye. Yesu azalaki koyebisa Saulo boye: “Ozali kaka te kotelemela bato; ozali kobundisa Ngai moko.”

BITULU MIBALE YA BATO OYO BAZALI KONYOKOLA KRISTO LELO

1. Bato oyo bazali kondima te mpe batelemelaka Lingomba

Paulo azali ndakisa ya moto ya losambo oyo ayebanaki te na Yesu, kasi azalaki kotelemela makasi bato oyo bayebanaki na Ye. Azalaki kobenda Bakristo na bandako na bango, kotia bango na boloko, mpe ata kondima ete babomama (tala Misala 8:1–3).

Lelo mpe, ezali naino na bato, bakonzi, masanga, to bato moko-moko oyo:

• batelemelaka Mangomba ya solo,

• balobaka mabe mpo na basaleli ya Nzambe,

• basekaka, to banyokolaka na nzoto bandimi.

Kasi oyo bakoki koyeba te ezali ete, na kosala bongo, bazali konyokola Kristo Ye moko.

“Solo, nazali koloba na bino: nyonso oyo bosalaki moko ya bandeko na Ngai oyo bazali mike, bosalaki yango mpo na Ngai.”
— Matayo 25:40 (Mokanda na Bomɔ́i)

Soki ozali na etuluku oyo — ezala na misala, maloba, to makanisi — bongola motema lelo. Zongela Yesu mpe yamba ngolu na Ye. Kokoba te kobunda Ye oyo akufaki mpo na kobikisa yo.

2. Bandimi oyo bakweyaka mpe bazongelaka masumu

Ezali mpe na lolenge mosusu oyo bato bakoki konyokola Kristo, mpe yango ewutaka kati na Lingomba moko.

Yango esalemaka tango moto ayambaki solo lobiko, ayokaki mosala ya Molimo Mosantu, mpe ayekolaki bolamu ya Liloba ya Nzambe, kasi na motema mobimba azongi lisusu na bomoi na ye ya kala ya masumu.

“Pamba te mpo na bato oyo balamwaki mbala moko, bayokaki likabo ya likolo, bakomaki na boyokani na Molimo Mosantu, mpe sima bakweyaki lisusu, ekoki te kozongisa bango na bobongoli ya motema, pamba te bazali lisusu kobaka Mwana ya Nzambe na ekulusu mpe koseka Ye liboso ya bato.”
— Baebre 6:4–6 (Mokanda na Bomɔ́i)

Yango ezali kaka te kokwea na kondima; ezali lokola kobaka lisusu Kristo na ekulusu, komona mbeka na Ye lokola eloko ya mpamba. Ezali libunga moke te; ezali botomboki ya molimo.

Tango yo, lokola mondimi:

• ozongi na bondumba ya nzoto,

• omipesi na masanga makasi mpe bisengo ya mokili,

• okanisi ete lisumu ezali likambo ya mpamba…

…ozali kosala Mobikisi pasi, Ye oyo akufaki mpo na yo.

Ezali lokola mwana kobeta tata na ye moko. Yango ezali te lisuma monene?

TIKA KOSALA LISUMU LOKOLA LISANO

Kómela te masumu mpiko mpo kaka olobi ete “nabikaki kala.” Masumu ya mondimi ezali lokola te masumu ya bato ya mokili; ezali misala ya kobuka boyokani na Nzambe.

“Soki tozali kosala masumu na nko sima ya koyeba solo, mbeka moko lisusu mpo na masumu etikala te.”
— Baebre 10:26 (Mokanda na Bomɔ́i)

Bongo mituna oyo, mituna yo moko na bosolo:

Oyambaki Kristo mpo na kozongela kosala Ye pasi?

ZONGELA BOSANTU

Bongola motema na motema mobimba. Zongela Kristo liboso motema na yo ekóma makasi mingi mpe oyoka lisusu te kosambisama.

“Boluka kimya na bato nyonso mpe bosantu, pamba te soki bosantu ezali te, moto moko te akomona Nkolo.”
— Baebre 12:14 (Mokanda na Bomɔ́i)

Lingá boyengebene. Landá bomoi ya bosantu. Yesu akufaki te mpo tózala lokola mokili. Akufaki mpo na kokangola biso na masumu.

• Bato oyo bandimi te bakonyokolaka Kristo tango batelemelaka Lingomba na Ye.

• Bandimi bakonyokolaka Kristo tango bazongelaka masumu sima ya koyeba solo.

Ezala ozali na mokili to kati na Lingomba, soki bomoi na yo ezali kosala Kristo mawa, bongola motema.
Pona bosantu. Landa Yesu na motema ya solo.
Kómá te moto oyo akomemela mawa Ye oyo abikisaki yo.

👉🏾 Landá mpe kota na chaîne na ngai ya WhatsApp mpo na mateya mosusu:
https://whatsapp.com/channel/0029Vb6labc8V0tfRqKKY11y

Print this post