OBENGAMAKI MPO NA KOZALA MOTATOLI, EZALI TE MPO NA KOZALA MOTÉYI YA LILOBA

Misala ya Bantoma 1:8 (Mokanda na Bomoi)
“Kasi bokozwa nguya tango Molimo Mosantu akokitela bino; mpe bokozala batatoli na ngai na Yerusaleme, na Yuda mobimba, na Samaria mpe kino na suka ya mokili.”

Ezali na bokeseni monene kati na motéyi ya Liloba mpe motatoli.
Koyebisa Liloba (ko-prêcher) mpe kotatola (témoignage) ezali eloko moko te.

Yesu abengaki biso nyonso mpo na kozala batatoli na mokili. Lobɔkɔ oyo ezali mpo na bandimi nyonso. Ezali te kaka mpo na koteya masakoli, kasi mpo na kotatola na bomoi na biso.

Motéyi ya Liloba azali nani?

Motéyi ya Liloba azali moto oyo atelemaka na Biblia, atángaka mpe ateyaka Makomi, alimbolaka masolo mpe mateya ya Biblia, mpe azelaka bato bálongola biyano na mateya wana. Moto wana akoki kozala pasteur, évangéliste, apôtre, évêque, prêtre, mpe bamosusu.

Motatoli azali nani?

Motatoli azali moto oyo amoni solo ya likambo moko, mpe atelemaka mpo na kondimisa mpe kotatola solo yango.
Yango nde mosala na biso nyonso liboso ya Klisto: kozala batatoli na Ye na mokili mobimba, kotatola makambo oyo asali na bomoi na biso, kolakisa ete maloba na Ye ezali solo pamba te toyekoli yango na bomoi na biso moko.

Ndakisa: tango Yesu alobaki:
“Boya epai na ngai, bino nyonso bozali kolemba mpe bozali na mikumba ya kilo, mpe ngai nakopesa bino bopemi”
(Matai 11:28 – Mokanda na Bomoi),

soki oyaki epai na Ye mpe omoni ete mikumba na yo elongwaki, esengeli otelemela kotatola yango mpo ete basusu mpe bandima mpe bazwa bopemi yango.

Lisusu, tango Yesu alobaki:
“Bobongola mitema, mpe moto na moto kati na bino abatizama na nkombo ya Yesu Klisto mpo na bolimbisi ya masumu na bino, mpe bokozwa likabo ya Molimo Mosantu”
(Misala 2:38 – Mokanda na Bomoi),

soki ozwi Molimo Mosantu mpe oyebi solo yango, wana nde tango okoki kokende kotatola epai ya basusu.

Soki obikisami, obotolami na minyoko, omoni likamwisi, to Nzambe apesi yo nguya ya kolonga lisumu moko boye—yango nde témoignage na yo. Mpe na nzela ya témoignage yango, basusu bakolendisama mpo na kondima Yesu ndenge yo ondima, mpe na suka bakobika.

Témoignage esengaka te théologie

Mosala oyo esengaka te boyebi mingi ya théologie, bokóli ya molimo, kokila bilei to kosala mabondeli ya minene. Esengaka kaka ofungola monoko na yo mpe oyebisa basusu bolamu oyo omoni kati na Klisto. Yango nde nzela oyo Nzambe asalelaka mpo na kondimisa mitema mpe komema bato na lobiko.

Ndakisa ya Paulo – Misala 9

Soki ozali Moklisto oyo abikisami ata lelo, yeba ete banda sik’oyo ozali na mokumba ya kotatola bolamu ya Klisto, ata na maloba moke oyo ozali na yango. Yango nde Paulo asalaki mbala moko nsima ya kobatizama na ye.

Misala 9 (Mokanda na Bomoi)
17 Ananiasi akendeki, akotaki na ndako, atielaki Saulo maboko mpe alobaki: “Ndeko Saulo, Nkolo Yesu oyo amimonisaki epai na yo na nzela oyo oyaki, atindi ngai mpo ete omona lisusu mpe otondisama na Molimo Mosantu.”
18 Mbala moko, biloko lokola makala ekweyaki na miso na ye, amonaki lisusu; atelemaki mpe abatizamaki.
19 Nsima ya kolia, azwaki lisusu nguya. Saulo avandaki mwa mikolo elongo na bayekoli na Damas.
20 Mbala moko, abandaki koteya Yesu na bandako ya losambo, koloba ete: “Ye azali Mwana na Nzambe.”
21 Bato nyonso oyo bayokaki ye bakamwaki mpe balobaki: “Bonso oyo te moto oyo abebisaki bato oyo bazalaki kobelela nkombo oyo na Yerusaleme?”
22 Kasi Saulo akómaki na nguya koleka, mpe azalaki kolakisa na Bayuda ya Damas ete Yesu azali Klisto.
23 Nsima ya mikolo mingi, Bayuda basalaki likita mpo na koboma ye.

Likambo ya mabe na makanisi ya évangélisation

Likambo ya mabe ebandaka tango tokanisaka ete évangélisation ezali kaka mpo na bato ya sipesiale mpe ete ezali mpasi. Te! Yeba ete Nzambe nde akondimisaka mitema, ezalaki te na motángo ya bavɛrsɛ oyo otángaka to mayele na yo ya koteya, kasi Molimo Mosantu kaka. Maloba moke ya kotatola Yesu ekoki kobongola bomoi ya moto koleka bavɛrsɛ nkóto.

Tango okendaka kotatola, kobanga te mpe kokanisa mingi te makambo ya koloba. Bandá kaka na esika Yesu abongolaki bomoi na yo. Yebisa lisolo yango na bokebi. Okokamwa ndenge Nzambe akopesa yo bwanya mpe maloba na kati-kati ya masolo. Mbala mosusu moto akotuna motuna, mpe eyano ekobima kaka na monoko na yo. Komitiyola te mpe kobanga te. Moto akondimisaka azali Nzambe. Soki bayoki to te, yango ezali mokumba na yo te. Zalá na mpiko, pamba te sango nyonso oyo ezali na Klisto na kati ebimisaka mbuma.

Bandá sik’oyo kotatola Yesu. Elongo, tótonga Bokonzi ya Klisto. Bandá na baninga, libota, baninga ya mosala mpe ba-voisin, liboso ya kokende kino na suka ya mokili.

Nzambe apambola yo.

Kabola sango malamu oyo na basusu.

👉🏾 Kota na WhatsApp channel na biso awa:
https://whatsapp.com/channel/0029Vb6labc8V0tfRqKKY11y

Print this post