Ezali na bokeseni kati na kopesa Nzambe matondi mpe kopesa Nzambe nkembo.

Tango Nzambe asaleli yo likambo ya malamu—tango apesi yo kimya ya motema, esengo, to ayanolaki libondeli na yo—ezali likambo ya malamu mpe ya nkita ete motema ya matondi ekita na Nzambe mpo na kosala ye matondi. Mbala mingi, bandimi bakangisaka matondi na bango mpe na mbeka ya matondi, mpe yango esepelisaka Nzambe.

Kasi ezali mpe na likambo mosusu oyo esepelisaka Nzambe mingi koleka, mpe efungolaka bikuke ya mapamboli koleka: zonga mpe pesa Nzambe nkembo.

Kopesa Nzambe nkembo elingi koloba kozonga mpe koyebisa polele na miso ya bato nyonso makambo nyonso Nzambe asaleli yo, mpo ete Nzambe atombolama na kati ya bato.

Bato mingi batyaka likambo oyo na motuya moke, kasi ezali na motuya monene mingi. Osilá naino kozonga mpo na kopesa Nzambe nkembo mpo na likambo moko ya malamu oyo asaleli yo?

Tótanga lisolo oyo eyebani malamu na Biblia:

Luka 17:11–19
Tango azalaki kokende na Yelusalemi, alekaki na kati ya Samaria mpe Galilea.
Tango akotaki na mboka moko, akutaki mibali zomi oyo bazalaki na bokono ya maba; batelemaki mosika.
Bagangaki na mongongo makasi, balobaki: Yesu, Mokonzi, yokela biso mawa!
Tango amonaki bango, alobaki: Bokende, bomimonisa epai ya banganga-nzambe. Mpe wana bazalaki kokende, babikisamaki.
Moko kati na bango, tango amonaki ete abiki, azongaki, azalaki kopesa Nzambe nkembo na mongongo makasi,
akweaki elongi na ye na mabele na makolo ya Yesu, azalaki kopesa ye matondi; mpe azalaki Mosamaria.
Yesu alobaki: Boni, bato nyonso zomi babikisamaki te? Bongo libwa wana nyonso ezali wapi?
Ezali moto mosusu te oyo azongi mpo na kopesa Nzambe nkembo, bobele mopaya oyo?
Mpe alobaki na ye: Telema, kende; bondimi na yo ebikisi yo.

Bato zomi babikisamaki, kasi moto moko kaka nde azongaki mpo na kopesa Nzambe nkembo na polele. Bamosusu libwa mbala mosusu bapesisaki matondi, mbala mosusu bapesaki mbeka, kasi bazongaki te mpo na kopesa Nzambe nkembo.

Yango eteyi biso ete: kopesa matondi ezali malamu, kasi kopesa Nzambe nkembo na nzela ya litatoli ezali na nguya mingi koleka.

Kopesa Nzambe nkembo na nzela ya litatoli

Nzambe alingi ete makambo asalaka na bomoi na biso ekoma litatoli oyo ekobenda bato epai na Ye.

“Baye babikisami na Nkolo básengeli koloba yango.” (Nzembo 107:2)

Soki Nzambe abikisaki yo na bokono moko oyo ezalaki mpasi kobika, ozalaka koyebisa bato? To ozalaka kaka kopesa nkembo epai ya badoktɛr mpe kobosana Nzambe?

Soki Nzambe apesi yo mwana sima ya mibu mingi ya kozanga kobota, bato bayokaka polele ete Nzambe nde asalaki likambo?

Biloko nyonso tozali na yango—bomoi, nzoto ya malamu, ndako, mosala, kelasi, lokumu, makasi—nyonso ewuti epai ya Nzambe.

“Likabo nyonso ya malamu ewuti likolo, epai ya Nzambe.” (Yakobo 1:17)

Bato basengeli komona boboto ya Nzambe na bomoi na yo, kasi kaka te makasi na yo moko.

“Ezala biso te, Nkolo, kasi ezala nkombo na Yo nde epesama nkembo.” (Nzembo 115:1)

Nzambe asalaka mpo na kobikisa bato, kasi te mpo na kosala ete banguna bayoka pasi

Nzambe apambolaka yo te mpo ete banguna bayoka pasi, kasi mpo ete bato babaluka epai na Ye.

“Nkolo alingi te ete moto moko abunga, kasi alingi ete bato nyonso babongola mitema.” (2 Petelo 3:9)

Tango ozali kopesa litatoli ya malamu—koloba esika Nzambe alongaki yo, ndenge ozalaki, mpe ndenge abikisaki yo—bato bakotika kosala momekano na yo, bakobanda koluka Nzambe na yo.

Bakoloba: “Ngai mpe nasala nini mpo Nzambe asalela ngai ndenge asalelaki yo?”

Yango nde nguya ya litatoli oyo epesaka Nzambe nkembo.

“Balongaki ye na makila ya Mwana-Mpate mpe na liloba ya litatoli na bango.” (Emoniseli 12:11)

Libenga

Kobosanaka te kozonga mpo na kopesa Nzambe nkembo mpo na likambo nyonso asaleli yo, ata ezala moke.

Yebisa yango na lingomba.
Yebisa yango na baninga.
Yebisa yango na libota.
Yebisa yango epai nyonso oyo Nzambe apesi yo nzela.

Kasi sala ete mokano na yo ezala kaka moko: Nzambe nde atombolama, kasi yo te.

“Tika polele na yo engenga liboso ya bato, mpo ete bamona misala na yo ya malamu mpe bapesa Tata na bino ya likolo nkembo.” (Matai 5:16)

Nkolo apambola yo mingi.
Amen.

Print this post